لماذا يثبت الوزن رغم الدايت والتمارين؟ دليلكِ لفهم جسمك والحلول العملية

إعداد وتنسيق: منصة «حرمون» بالتعاون مع أخصائية التغذية راما ربيع نور الدين

يسرّ منصة «حرمون» أن تقدم لقرائها الكرام وقفة توعوية مميزة مع أخصائية التغذية راما ربيع نور الدين، لتسليط الضوء على أساسيات التغذية الصحية وكيفية التمييز بين الجوع الجسدي والعاطفي، للوصول إلى نظام غذائي متوازن بعيداً عن الحرمان أو الحميات القاسية؛ فالتغذية السليمة هي الركيزة الأساسية لتعزيز الصحة والعافية وتزويد الجسم باحتياجاته.

“عم التزم بكل شي، قاطعة الحلويات والخبز، وعم اتمرن… بس الميزان واقف محله ولا عم يتحرك غرام!” 😩⚖️

هاد أكتر سيناريو بيصير مع أغلب الناس، وبصراحة هو أكتر مرحلة بتخلي الشخص ييأس ويترك الدايت. بس خلينا نفهم سوا شو عم يصير جوا جسمك بالضبط؛ لأن جسمك مو عم يعاندك، هو بس عم يتعامل مع التغييرات بطريقته!

تعو نفصّل سوا الأسباب الحقيقية لثبات الوزن وكيف نحل كل واحد منها:

١. السعرات المخفية (“النقنقة” اللاإرادية)
كثير أحيان بنفكر حالنا ما أكلنا شي، بس لو راجعنا يومنا بنلاقي: معلقة دوقان للطبخة، حبتين تمر عالواقف، رشة زيت زيتون زيادة فوق السلطة، أو كم حبة مكسرات ونحنا عم نحضر التلفزيون. هدول الأشياء الصغيرة سعراتها عالية، ولما تتجمع بتلغي “عجز السعرات” اللي عم تعمليه وبيثبت الوزن.

الحل: جربي تسجلي كل شي بيدخل تمك لمدة 3 أيام بس، رح تتفاجئي!

٢. احتباس السوائل (وزن وهمي مو دهون)
جسمنا مو آلة حاسبة، وزنه بيتغير كل يوم بسبب المي مو الدهون. إذا أكلتي وجبة مالحة (مخلل، أجبان، شيبس)، أو بلشتي رياضة جديدة (العضلات بتحبس مي لتعمل استشفاء)، أو سهرتي، أو قرب موعد الدورة الشهرية؛ جسمك رح يخزن سوائل. وهون بيكون جسمك عم يحرق دهون فعلاً، بس المي المحبوسة عم تخبي النزول عالميزان.

الحل: اشربي مي كفاية (لترين عالأقل)، خففي ملح، وما توزني حالك يومياً.

٣. الحرمان الشديد وتقليل الأكل كتير (وضع المجاعة)
لما تحرمي حالك وتنزلي بسعراتك بشكل قاسي فجأة، جسمك بيعتبر حاله في خطر ومجاعة! شو بيعمل ليحميكِ؟ بيقلل معدل الحرق (الأيض) لأقل درجة ممكنة، وبيتمسك بكل غرام دهون مخزن عنده، وبتصيري تحسي بتعب وخمول.

الحل: النزول الصحي بده أكل متوازن وكافي (خاصة البروتين)، مو تجويع.

٤. عم تبدلي “دهون” بـ “عضل” (إعادة تشكيل الجسم)
إذا عم تلعبي تمارين مقاومة أو رياضة بانتظام، فجسمك عم يحرق دهون ويبني كتلة عضلية بنفس الوقت. ولأن العضل وزنه أثقل وحجمه أصغر من الدهون، رح تلاقي الرقم عالميزان ثابت، بس مقاسات تيابك عم توسع وشكل جسمك عم ينشد!

الحل: اعتمدي على المتر (قياس الخصر والأرداف) وصورك بالمراية أكتر من الميزان.

٥. قلة النوم والتوتر المستمر (هرمون الكورتيزول)
السهر وقلة النوم والضغط النفسي بيرفعوا هرمون الكورتيزول بالجسم. هاد الهرمون بيوقف حرق الدهون، بيخزن دهون بالبطن تحديداً، وبيفتح شهيتك عالسكريات تاني يوم.

الحل: النوم 7–8 ساعات بالليل هو جزء أساسي من الدايت متله متل الأكل.

٦. أسباب طبية وهرمونية مخفية
إذا التزمتي بكل شي صح لمدة شهر وأكتر ولسا ما في أي استجابة لا بالميزان ولا بالمقاسات، هون لازم نعمل فحوصات طبية لنطمن على:

خمول الغدة الدرقية: بتبطئ الحرق بشكل كبير.

مقاومة الإنسولين أو تكيس المبايض: بتخلي الجسم يخزن دهون بسهولة ويصعب نزولها.

نقص فيتامين د أو الحديد: بياثروا بشكل مباشر على طاقة الجسم ومعدل الحرق.

نصيحتي إلك من القلب 💡
ثبات الوزن مرحلة طبيعية بتمر على الكل، وهي علامة إنو جسمك عم يتأقلم مع وزنه الجديد قبل ما يكمل نزول. لا تستسلمي، اركني الميزان على جنب أسبوعين، ركزي على شرب المي والبروتين والمشي، وكملي.. النتيجة جاية أكيد!

📞 للتواصل والاستشارة: 0931637524

تواصل معنا
تواصل معنا
استماع إلى المقال
1.00x