يا ابني

فرحان العريضي*

وصية أب لإبنه:
(الشاعر فرحان العريضي)
يا ابني الصرت شلفون اول مطلعك
خايف عليك من الدهر تا يوجعك
عندي الك هالكلمتين من الصميم
بلكي عن الأغلاط بقدر امنعك
حتى يا ابني تنعم بعيش الكريم
إلّا ضميرك بالدني ما بينفعك
إيّاك تترك شغلك وتلحق زعيم
مليون مرّه بتسمعو ما بيسمعك
إيّاك تاكل قرش من حق اليتيم
مهما جعت هالمال ما بيشبّعك
إيّاك تشمت في حدا بموقف أليم
عيب الشماته وما بترفع موقعك
إيّاك مرّه بالحكي تجادل غشيم
لا فيك انتا تقنعو ولا بيقنعك
لا تصدّق الكذّاب وتصادق لئيم
لا ترافق السرّاق يمكن ينزعك
خلّيك ماشي عالصراط المستقيم
حتّى مع الأشراف تحفظ موضعك
لما تكون مهذّب ونهجك قويم
مليون واحد عالطريق بيتبعك
لكن اذا ما كان تفكيرك سليم
ما فيك تتلطّى بفيّة اصبعك
في زاجتك لولا برمت بين الحريم
ما يغرّك المظهر ببنت ويخدعك
بنت الأصول بتاخذك صوب النعيم
بنت الهوى عالأرض فيها ترجّعك
ان مشيت هيك بتكتفي الله العليم
والناس في اعلى مكانه بتقشعك
هوذي الوصايا لو انتبعو بتستقيم
من بي قبلك بالدني ياما اندعك
يا ابني حياة الناس صعبه تستديم
اوعدني بتمشي بهالخُطى أمّا انا
بكرا يا ابني بموت مش باقي معك

*شاعر لبناني راحل من بيصور.