سليم سعاده: الفجوات المالية والهدر ثقب أسود ابتلع بلداً

أقام ملتقى النهضة مساء الثلاثاء الفائت في قاعة الأمينين ناديا ومسعد حجل ندوة حوارية مع النائب السابق الأستاذ سليم سعاده بعنوان:” حكاية أموال المودعين” وأدار الندوة الخبير في التنمية الاقتصادية والاجتماعية الأستاذ هشام أبو جودة الذي شكر الامينة ناديا حجل على استقبالها في هذا المركز الثقافي المسمى باسمها واسم الراحل الامين مسعد حجل، ومن خلالها اشكر كل الذين عملوا على تهيئة الصالة الجديدة وخاصة العزيزة سوسن عون والسيد علي وهبه.

كما رحب باسم ملتقى النهضة بالحضور الذي “يزيدنا اصرارا على متابعة أعمالنا وبنفس الروحية والاندفاع. “

وتابع قائلاً … ملتقى النهضة تجمع ثقافي اجتماعي يعمل علىلااستعادة حيوية فعل النهضة واستنهاض الإمكانيات وتأطيرها في خدمة المجتمع وانسانه على كافة المستويات وبالتعاون والتشبيك مع الأفراد والهيئات والمؤسسات الاجتماعية الخاصة والرسمية، وان اهم ما نصبوا اليه هو اعادة الصراع الفكري كمرتكز اساسي لوحدة شعبنا كونه الفعل المميز في مواجهة الفتن والتقسيم والتباعد.

تأتي ندوة اليوم “حكاية اموال المودعين” في ظل استمرار الانهيار الاقتصادي والمالي والنقدي، والأرقام والنسب الحالية تشير الى ان لبنان قد بداء تخطي خطوط الاعودة في بعض المجالات، وان وقف الانهيار يجب ان يكون المهمة الاولى لنا جميعا والا سندخل في انهيار مستمر لا خروج ولا نهاية له.

بلغ حج الهجرة في السنوات الثلاث الاخير حوالي 300 الف اغلبهم من الفئة العمرية الشابة المنتجة، بينما تبلغ نسبة التشغيل 42% من القوى العاملة المتوفرة، و30% حجم البطالة، و60% من اللبنانيات واللبنانيبن لا يعملون ولا يتعلمون ولا يتدربون، وقد انخفض الناتج الى 34 مليار دولار، وارتفعت نسبة الذين يعانون من نوع من انواع الفقر الى ما يزيد عن نصف السكان بينما يعاني 80% من موظفي القطاع العام من الفقر.

بعد سنوات من الكذب ومعرفة انهم يكذبون ويعلم من يكذب عليهم انهم كاذبون وهم يعلمون ان هؤلاء يعلمون انهم كاذبون، سقط لبنان في كذب الأوهام: افضل نظام مصرفي في العالم، افضل نظام تربوي، افضل مستشفى، افضل سياحة افضل من افضل. سنة 2019 خسر البنانيون ودائعهم فسقط اخر معقل للفلاح اللبناني الذي اعتبر سلطان مخفي، ومن يومها يسأل الجميع اين اموالنا اين ودائعنا؟.

سليم عبدالله سعاده، اقتصادي يحمل عدة إجازات بالاقتصاد من الجامعة الأميركية في بيروت وجامعة لندن وكلية سانت لويس في الولايات المتحدة الاميركية، علم مادة الاقتصاد في عدة جامعات،

نائب في البرلمان اللبناني لأربع دورات، احبه اللبنانيون كل اللبنانيين لانه كان صريحا صادقا معهم مهضوما في اسلوبه علميا وواضحا في مقارباته، ابن مدرسة فكرية تعلم ان المسؤولية شأن كبير في الحياة. نذكر يوم ضحكت المنظومة الماً عندما خاطبها بانها سرقت العالم وان من لم يسرق شهد على السرقة وكان شيطانا اخرس، كان كلامه قاسيا جدا عليهم فاعتبروه مزاح، لكنه فعليا كان سوطا الهب ظهورهم في جديته ودقته.

مداخلة النائب السابق الامين سليم سعاده

أول شي هيدي هيّ التجربة التانية إلي انا، حكيت مرة قبل ما فرطت البلد في بلدية أميون، هالحكي اكتر من 5 سنين وهيدي التجربة التانية إلي. هيدي الفكرة الحقيقة لهشام هوي كان ورا هالفكرة وطبعاً انا قابلتا بترحيب شديد، خاصة بضيافة الأمينة ناديا مافينا نقول لاء.

موضوع حكاية أموال المودعين موضوع هوي أوسع من هيك، نحن كلنا مودعين، نحن عم نحكي موظفين القطاع العام بيقتطعوا من معاشو مبلغ معين تآخر شي لمّا يجي يتقاعد بيعطوه ياهن يا تعويض يا معاش تقاعدي، هودي ودائع بالنسبة إلو هوي، هودي عم يجمعولوا ياهن تيعطوه ياهن، هي وديعة.

نفس الشي الضمان الاجتماعي الي بيقبض بالقطاع الخاص بالضمان الاجتماعي هودي وديعة بيقشطوه للضمان وبعدين بيجي بيقبضهم. بقا مش بس المودعين تبع المصارف هني يلي أكلوها، كل المودعين بلبنان حتى النقابات، المهن الحرة، الأطباء، المهندسين، المحاميين،أطباء أسنان، كمان أكلوها كلن سوا، مافي حدا كان متكل على تعويض شهري او معاش شهري بنقابة، بصندوق، معلمين خاص، إلا ما اختفى وطارت الوديعة تبعو، بقا هاد موضوع الودائع للحقيقة منشان ما نفكر انو بيخص بس فريق معين، هوي بيخص كل اللبنانيين الحقيقة كلنا بهاد الموضوع أكلناها.

رح قد ما فيني اختصر، مع ان الموضوع طويل،

اول شي مجموع الودائع هلأ الموجودين بالمصارف 88 مليار دولار، هيدي مجموع الودائع كلا سوا، هودي بأكتر من مرحلة، انتقلوا من المصارف لمصرف لبنان، شي راح كشهادات إيداع حطن مصرف لبنان عندو شهادات إيداع وهول شهادات الإيداع كان يدفعلن فايدة عالية وكان موزعن مصرف لبنان في منن ما بيستحقوا ال maturity تبعن لل2040 حتى كمان يعني كانوا متدرجين هودي اسمن certificates of deposits  هودي قسم من الودائع راح هيك.

 قسم ثاني انكب على يورو بوندز((Euro bonds، وخبرية ل يورو بوندز طريفة جداً لأنو يعني اكبر نصبة بتاريخ العالم المالي هوي قصة ال يورو بوندز أكبر حفلة نصب بالعالم و تفوق فيها مصرف لبنان على كارلو بونزي بالأساس يلي اخترع حفلة النصب هيدي، لانو كان اليورو بوندز إلي انباعوا 30 مليار دولار كنت بس تشتريهن تربح عالحارك، يعني مثلاً انت بدك تشتري مئة مليون دولار يورو بوندز بيقلك ادفعلي 80 مليون دولار وخود 100 مليون دولار يورو بوندز، يعني الربح عالحارك، وهيدا انا متأكد منو لان سنة 2017 المصارف دفعت بين 400-500 مليون دولار ضرائب ارباح للخزينة ونزلوا بالموازنات تبع الدولة اللبنانية.

قسم إذا مش كلهن من يورو بوندز 30 مليار دولار بالأساس جايين ودائع.

طبعا في بحدود ال 8 مليار دولار، ما تبقى من الاحتياطي الإلزامي بعد في 8 مليارات مجموعن كلن سوا هودي يلي تحولوا من المصارف على مصرف لبنان 81 مليار من اصل 88 مليار، بقي بس بالمصارف ودائع 7 مليار دولار فقط هودي راحوا بالدين بالسوق المحلي. بقا الودائع كلها سوا اختفيت اتبخرت كلها سوا.

هلأ فجأة اكتشفنا انو في فجوة بمصرف لبنان 73 مليار دولار، 73.1 حتى كمان.

 اكتشفنا الفجوة، ليش اكتشفنا الفجوة لأن حضرته رياض سلامة حاكم مصرف لبنان كان كل سنة حسب قانون النقد و التسليف في قسم من ارباح مصرف لبنان تروح للخزينة بحكم قانون النقد والتسليف ما بتذكر أديش 30-40% الي هني بيروحوا للخزينة.

 هلأ مصرف لبنان عكتر ما كان الحاكن دكنجي ما بحياتو قدم بيان بالأرباح والخسائر أبداً، كل سنة يبعت لوزارة المالية خبرنا نحن علي حسن خليل لما كان وزير يبعت لوزارة المالية يبعت للخزينة 40 مليون انو هودي حصتكن بالأرباح.

تتشوف كيف نحن ماكنا عارفين أديش هالفجوة لأن نحن عم يجينا حصة من الأرباح يعمي مصرف لبنان عطول عم يربح، بقا تتشوف أديش كان دكنجي، بعدين منوصلو هيد الموضوع.

فإذاً هالمصريات هال 73 مليار دولار أول شي بدنا نعرف وين راحوا،هلق في 27 مليار دفاعاً عن سعر صرف الليرة للدولار (1500ل مقابل دولار)، انا بالغلط شفتا عالتلفزيون لمن فخامة الرئيس ميشيل عون استدعى رياض سلامة ع بعبدا و فرجاه حاطتن عالورقة بكدش بالخط غيدو اننو 27 مليار دولار هودي. يعني من 73 مليار دولار- 27 مليار طاروا لسعر صرف الليرة على ال 1500لل

القسم الثاني حوالي 15 مليار دولار يوم حكومة حسان دياب، كمان هي مسؤولية مصرف لبنان هودي راحوا دعم عشوائي لكل السلع يعني الحقيقة هوي دعم للتجار لأنو هوي يلي ربح و استفادوا هني التجار والاقتصاد السوري بتهريب البنزين

بس انو هو 15 مليار زت مصاري ونحن بعدنا مفلسين، زت مصاري عم نربح التجار وهي شغلة معروفة بكل العالم بالاقتصاد، بإنو الدول الاشتراكية بتتملك وسائل الانتاج فيها تتدعم الي بدا ياه لأنو هيي يلي بتنتج هيي يلي بتخزن، هيي بتوزع، بتستورد، هي بتصدر، بس اقتصاد السوق انت ك دولة لبنانية ماعندا كونترول ع شي لابتشتري ولا بتبيع ولا بتخزن ولا بتوزع ولاشي انت مافيك تعمل كونترول ع دعم وسعر الدعم ومين عم يزعبر ومين عم يخزن ومين عم يهرب ومين يصدر، منشان هيك هيدا كلو زت مصاري عالفاضي.

السبب الحقيقي ان رياض سلامة كان عليه ضغط بدو يرضي الناس وحسان دياب كان عليه ضغط بدو يرضي الناس، هيدي مؤامرة مشتركة بين وزراء حسان دياب و رياض سلامة، و رياض سلامة بيجي ع الاجتماع يمسكن حالو ويقول انا هي شغلة مابعرف فيها جاي لأتعلم ع أساس هوي معتر هو مابيعرف. هودي 15 مليار يعني صرنا 42مليار.

 هلأ في كمان بموجودات مصرف لبنان في يورو بوندز 5 مليار و700 مليون، و انا بتقديري هودي هني يورو بوندز استحقوا ودفعهم مصرف لبنان لاصحابهم بتقديري هيك، واذا مش هيك بكونوا من بقيوا من حفلة اليوروبوندز ال 30 مليار دولار الي انباعوا.

 بعدا في الي سرقوا رياض سلامة 213 مليون دولار هودي سرقهن عداً ونقداً معروفين كان ياخد كومشن من سنترال بنك و يحولهم لشركة “فوري” يلي حاطت اخوه رئيسا، هودي نحن ما كمشناهن، الاتحاد الاوروبي كمشن، الفرنساوينن كمشوهن الالمان كمشوهن، البلجيكيين كمشوهن وهو مطلوب للانتربول ونحن ما قلنالوا محلا الكحل بعينك يا رياض سلامة.

بعدين يبقى 25 مليار دولار هودي انا بتقديري صارفتهم الخزينة، يعني اذا بتطلع انو كيف صارفة الخزينة 25 مليون بتلاقي انو الخزينة عندا كتير التزامات بالدولار، بس اهم واحد منن كلن سوا هني الفيول الي كان يروح لكهرباء لبنان. يعني في اكتر من النص اذا مش الكل هودي كان يروح لكهرباء لبنان و هودي سلف كلا سوا يعني رايحة بفرد جهة سلف.

هودي أغلب الظن كلن رايحين ع الفيول ع كهرباء لبنان يعني مش بس المودعين دعموا سعر الصرف ومش بس دعموا التجار ب 15 مليار قلنا المودعين دعموا الكهربا، دعموا سعر الكهربا، والكهربا دائما عنا بين 30-40% بين هدر و بين سرقة وكذا بس نحن كمان المودعين دعمنا سعر الكهرباء من ايام ايلي حبيقة الله يرحمه لايام الوزير فياض (وليد فياض) بيناتن 25 سنة سعر الكهربا بعدو هو ما تغير، ماحدا استرجى رفع سعر الكهربا، مابفتكر في شركة او مؤسسة بالعالم من أيام إيدسون لهلاء، شركة بالعالم ثبتت سعر الكهربا 25 سنة إلا نحن، عنا طبعاً كل واحد خايف ع شعبيتو بيجي على الكهربا مابدو يرفع سعرا تما حدا ينشر عرضو بقا نحن كمان دعمنا هيدا الموضوع.

 هودي متل ما قلتلكن 73 مليار في فوقن احتياطي الزامي 8 مليار دولار هودي هني ال 81 مليار دولار يلي تحولوا من المصارف لمصرف لبنان .

هلأ اول فضيحة ع ايام حسان دياب و مصرف لبنان كانوا عم يوعدوا الناس بدنا نردلكن الودائع وهم عم يصرفوهن.

– ما هني 15 مليار دولار هودي ودائع عم يصرفوهن وعم يسرقون هني ولتجار وهني عم يقولوا للناس ما ينشغل بالكن الودائع راجعة ونحن رح نرد لكن الودائع تنشوف أديش الفضيحة كبيرة بموضوع الودائع.

– هلق منطَلع على سيولة لمصارف، “قطاع المصارف” حيث الميزانية العمومية تبع المصارف 2023 وبالدولار بتطلع شو عندن ودائع؟ عندن و دائع ۸۸ مليار دولار، طيب شو عندن سيولة ؟ عند نصف مليار دولار كاش سيولة وعندن ودائع صافية بالبنوك الأجنبية مليارين و 300 مليون، يعني كل السيولة تبعن مليارين و ٨٠٠ مليون دولار مقابل ودائع ۸۸ مليار دولار عم نحكي عن 3,2% سيولة من الودائع كلهاسوا، نحن منعرف بالاقتصاد انو حتى إذا شركة بتبيع حديد أو بتعمر ما بتكفيها سيولة 3% بقا كيف اذا عم نحكي عن بنوك شغلتها انو تأمن الودائع للزبون لما بيطلبن؟ منشان هيك البنوك مفلسة لأنو ما عندا سيولة بالمرة ومنشان هيك مصرف لبنان مفلس لأن في فجوة 73 مليار ومنشان هيك الخزينة كمان فلست لأنو في عندا اليورو بوند بلي بلشوا مع البنوك وهلاً انتهى قسم كبير من على ‏ Vulture funds in London fidelity and ashmore‏

شركتين هودي بيلقطوا أي شي رخيص وبيشتروه هلأ صار عندن قسم كبير من اليورو بوندز عند fidelity and ashomer برا، يعني هيدي الخزينة لحد هلا ولآخر عم نحكي عند آخر موازنة ما جابوا سيرة لا الديون الي برا ولا الفوائد المترتبة عليهن يعني اشتغلوها على أساس يعني مصابين بالنسيان أو اشتغلوها على أساس ما بدن يفتحوا هالباب عليهن.

تنفرجيكن انو بعدا الموازنات مشبشلة ويلي هيّ مَنَّا مزبوطة بعدا ما شية.

شو رأينا بإنو هالودائع رح ترجع؟ طبعاً كل يوم بتقرأ دراسة من كل الجهات عن الودائع كيف يردوها وكيف يوزعوا هالخسارة بيناتن، مصرف لبنان – البنوك – الخزينة، كيف يتوزعوا هالخسارة بيناتهم ومنشان يقدروا يردوا الودائع

طبعاً انا ما بدي يأس حدا لأنو والدتي كانت تعلمني دائما قول ما اضيق العيش لولا فسحة الأمل. انو لازم نحنا نضل متأملين انو هالودائع بترجع او بيرجع قسم منها و لكن انا بعطيكن وقائع قديش صعب ترجع هالودائع.

منبلش بأهم شي انو لبنان بلد ما فيه قرار- مختصر مفيد الدولة اللبنانية ماتت ب 76 و الجيش اللبناني توزع وراح. اذا بتتذكروا احمد المعماري، احمد الخطيب.

الدروز طلعوا لعند وليد بيك. شي طلع عند ….الخ، ماتت الدولة سنة ١٩٧٦. رجع طبعاً حصلت ظروف معينة، فل ابو عمار، اجا الجيش السوري، اجا الرئيس الحريري، ضمانات سعودية، فرنسية، اميركية،سورية الي هوي، رجع ركب البلد.

بس استشهد الرئيس الحريري، فل الجيش السوري، رجعنا بلا قرار، يعني نحن هلق صارلنا ٢٠ سنة بلا قرار مافي قرار بالدولة اللبنانية. ليش مافي قرار لانو حتى لغيوا الحرب بلبنان بين الميليشيات يلي عم تتقاتل انجبروا يغيروا الدستور. كان اول الدستور انو رئيس الجمهورية بيحكم لبنان صار هلق دستورنا الكل يحكم ولا احد يحكم. هاد هوي الدستور منشان هيك ما عنا قرار، بلد مافيه قرار يعني ضايع، و هاد اهم اسباب الافلاس، انو مافي قرار لشي طبعاً لمن مافيه قرار معناتا مافي مساءلة و مافي محاسبة و لمن مافي مساءلة و مافي محاسبة ركب هالتركيبة تبعنا بيسموها بالانكليزي …اورجي ( حفلة عهر) بين اصحاب المصاري و بين مصرف لبنان و بين الطبقة السياسية ركبت حفلة عهر انا سميتها “نايمين بفرد تخت ماحدا عارف ايد مين بتم مين”.بقا هي الحقيقة هيك، هيدي بلا قرار و بلا مساءلة وبلا محاسبة، بعدا موجودة. على كل حال كيف بدا ترجع الودائع اذا يلي سرقوا الودائع كيف بدن يردوهم؟.

 مهم كتير نعرف انو بهاذا الموضوع بعدا الطبقة نفسها يعني اوعا حدا يفكر انو بمصرف لبنان بس رياض سلامة نصاب كلن نصابين لو ما كلن نصابين كان حدا حكي عنن لان عم يسرق على المكشوف كان.

منوصل عالطبقة السياسية فلست البلد و رحنا ع الانتخابات رجعناهن نفسهم. رجعوا نفس الناس فإذا حتى الشعب اللبناني راضي عن هالتركيبة هيدي يعني ما عندو مشكل فيها.

الشعب اللبناني كلو مبسوط بهالموضوع، فاذاً هاد كمان من الاسباب انو نلاقيها صعبة جداً ترجع الودائع.

 73 مليار دولار انصرفوا و حاكم مصرف لبنان بيسرق 213 مليون و ما حدا بيفوت عالحبس و ما حدا يتهم و ما حدا بيدعى عليه ولا شي. و كأن شيئاً لم يكن. ما حدا مفلس لا البنوكة و السنترال بنك مفلس ولا الخزينة مفلسة.

أهم من الاشياء يلي انا هلق مش فاهمها انو بعدنا لهلق بلا حسابات نحن دولة بلبنان ما عندا حسابات الميزانية و الموازنة كلها سوا single entry مثل حساب الدكانة cash basis. ما بحياتن قالو عنا قطع حساب ولا بحياتو انعمل قطع حساب بناس عندا قدرات تقدر تعمل قطع حساب مَش بيبعتوها لعند كم قاضي خرفان يعملوا قطع حساب ونفس الشي قلتلكن ياه السنترال بنك يلي هيدا أم الدني كان يبعت للخزينة انو هودي ربحاتكن 40 مليون دولار راحو انبسطوا فيهن بقا حتى السنترال بنك ما كان يعمل بيان بالارباح و الخسائر (profit and loss statement) بقا نحن بدون ارقام كيف بدنا نرد الودايع مافي عنا أرقام صرلنا 5 سنين مفلسين ما تصلح شي بالبلد مافي شي اتصلح ابدا.

 انا عم احكي على صعيد الإصلاحات يلي بترد البلد على المسار الصحيح، نحكي الحقيقة أيام حسان دياب عملوا مخطط اصلاحي بس ما حدا وافق عليه يعني كان مخطط وهمي هلأ انبسط جماعةIMF , جماعة world bank

 أنو هيدا ممتاز وهيك بس ماحدا بلبنان كلو كان موافق عليه، لهيك حتى نحن ماعنا مخطط اصلاحي عنا الـ  IMF  بتقول تعملوا هيك هيك بس نحن ما عنا مخطط .

موضوع الودائع كمان بالبنوك – البنوك بدا ترد الودائع للناس اذا بدا نستردهم طيب في ٨٠ – %٩٠ من البنوك مافي معن شي Zombi bank – موتی ما معن شي ما عندن شي ابدأ في كم بنك مرتبين بس الباقين كلن منتهيين ما فيهن شي.

وفي بنوك قوية كتير أنا بعرف مدير بنك مهم كتير قلي عن ما فتنا بعدة لاحتيال تبع رياض سلامة تبع البورو بوند ولا اشترينا ولا يورو بوند بس برغم هيك قلي خسرنا خسائر كبيرة بالسوق للبناني لما رجعت العالم عم ترد القروض تبعا عم تردن على أساس سعر الصرف يعني فرق بين سعر السوق وسعر الصرف، عم تردن على سعر الصرف، قلي تكبدنا خسائر كبيرة مشان هيك نحن مش قادرين ندفع للمود عين أموالن.( هيدا بنك ما اشترى يورو بوند )

بعدين كيف نحن لمَّا كان عنا الناتج المحلي 55 مليار دولار سرقنا الودائع وأكلناهن و هدرناهن هلا صار الناتج المحلي ١٨ مليار دولار يعني تلت الناتج المحلي القديم كيف بدنا نردن وكيف بدنا نرد لمَّا النمو كان هديك السنة 4-% .

في إشيا ضروري تعرفوها – لتعرفوا أديش لبلد خرب بطريقة احتساب الناتج المحلي ( هو دخل البلد) في طريقة كتير سهلة لتعرفوا أديش الناتج المحلي.

نحن منتعلموا بالاقتصاد بس هوي كتير سهل – أنا كنت فسرلن للنواب هالموضوع یا خدوا note .

4 شغلات دخل البلد متل أيّا دخل شخص أنا أو انتي أو أي حدا، المدخول عندو واحد من أربعة يا wages معاشات يا rents أجارات يا ‏interest  فوائد يا profits  أرباح . ما في جنس مصاري بيفوت ع جيبتك ‏الا من هالأربعة.

 خلينا نتطلع فيهن ونشوف هالبلد، الـ wages فرطوا مابقا يطلعوا وخاصة ما بيطلع 10% منها – الأجارات سكنية كلها راحت فرطت، ال interest صفر صارت مابقا في فوائد ما حدا عم يدفع فوائد لحدا، و الأرباح صارت صفر- بقا هيدا البلد

 يعني كيف هيك بلد ما عندو لا معاشات والا أجارات لا فوائد ولا أرباح – كيف قادر هيدا يرد لودائع – كتير صعب جداً – هلأ بتقلي إي في عنا سوق السودة مزبوط، في سوق سودة بالمخدرات – في سوق سودة تبيض الأموال – في أكثر من سوق سودة بلبنان بس هودي ما بجمعوا مصاري للدولة هودي لبرات الدولة – الدولة ما بتستفيد منن ما بفيدو الدولة بجوز بفيدوا الاقتصاد – ما بفيدوا الدولة اللبنانية على الإطلاق بموضوع لودائع.

السوق السودة ما بتفيد بموضوع الودائع على الإطلاق .

في أهم من هيدا كلو سوا بالاقتصاد نحن عنا دليل واحد اسمو النمو. الفرق بينا وبين المحاسب، المحاسب بيقلك الوضع هلق، متل ما أنا قريتلكن الميزانية العمومية للمصرف بالاقتصاد بتقرأ اتجاه أكثر ما تقرأ الوضع – بتقرأ الاتجاه كيف رايح نحن بالنسبة ل النا الاقتصاد اذا فيه نمو يعني عم يتحسن – وتيصير في نمو بلبنان بدك تمويل، و تيكون في عندك تمويل مين بدو يمولك، الدولة مفلسة – مصرف لبنان مفلس و البنوك مفلسة، هودي كان ما بيمولوا الـ IMF ما بيمولوا لأنوا اذا انت ما بتعمل الاصلاحات إلى طلبا مش بس ما بيمولك وما بيخلي غيرو يمولك.. لانو كفيلك انت برا هوي صندوق النقد إذا ما كفلك ما حدا بيمولك. وانت أساساً مفلس وما بتدفع اليورو بوندز تبعك، فإذا انت مافيك تنمن مستحيل تنمن الا بالسوق السودة، تما ما بعرف يمكن هودي الودائع كلمة مشتقة من وداع مش من وديعة.، عم إحكي جد، وأنا إذا سألوني بترجع الودائع بقلك لبنان أسهل إلو يطير صاروخ على القمر من انو يرد الودائع للعالم – هيدا رأي أنا لأنو أنا بتابع وبلاحق كل شي كل يوم في مليون مخطط ومليون خطة ومليون قصه وكل يوم بكذبوا ع الناس، ساعة منردلكن اول 100 ألف دولار وقسموا الودائع بين مأهل وغير مأهل يعنى كل يوم في كذبة جديدة.

 بس هيدا كلو بالنتيجة بيرجع إنو بتاريخ العالم ما في مرة فلسوا هول كلن سوا يعني الخزينة والبنك المركزي والمصارف يفلسوا كلن سوا بفرد وقت معناتها ما في حدا فيه يشيل الثاني وأنا حذرت من هالموضوع قبل مافلس البلد – انو يا عمي في شي اسمو financed meltdown  بدون البلد كلو سوا بروح، ما سمعو فينا.

يلي صار أكبر غلطتين كبار عملناهن كان النصبة الكبيرة تبع اليورو بوندز يلي صرنا نعطي (يعني الربح) على cash والغلطة الثانية ب 2017 كانت جاية بداية انتخابات 2018 قاموا عملوا زودات للموظفين للمتقاعدين بمجلس النواب – أنا ما كنت نائب والحمد الله وقتها، بس على أساس أنو الزودات كلا هيدي بتكلف ٨٠٠ مليون دولار وبالمقابل محضرين هني مروحة من الرسوم والضراب بتعمل مليار و  200مليون، بيطلع صار عنا وفر بعد ما بيمشي القانون – طلع بالنتيجة وقت صرت نائب وقت نجحت بالانتخابات وكنت بلجنة المال والموازنة بأول اجتماع قلت ل ابراهيم كنعان عطينا الـحسبة… قلي ايّا حسبة قلت انتو قلتو أنو هودي بكلفوا ٨٠٠ وانتو بتدخلوا مقابيلن ملیار و ٢٠٠ قام والله ودّا ورا علي حسن خليل واجا علي حسن خليل قال ياخيِّ نحن هيدي الزودة فوق المليارين دولار وبعد ما خلصت لأن بتعرف هي من مؤسسة ل مؤسسة كلو بيطالب وكلو وبيلحق وقال نحن مداخيلنا مش بس ما زادت! نقصت.

 يعني نحن هيدي بيقولوها الشعرة التي قصمت ظهر البعير هني (2) اليورو بوند من جهة ومن جهة ثانية مليارين دولار زودة انعطيوا سنة 2017 بس للتذكير, هلا بالموازنة هيدي على المعاشات كلا 770 مليون دولار وقتا اجتهم الزودة وحدا مليارين دولار

تتشوفوا الفرق وين كنا وين صرنا بقا هيدي من الأسباب يلي هريتنا لأنو انت عندك من ناحية عجز بميزان المدفوعات وعجز بالميزان التجاري وعجز بالحساب الجاري ومن ناحية ثانية عندك عجز بالموازنة وعم تمرق سلف سلف من برات الموازنة هيدي كلا مانا مغطاية بقا هيك بيصير بالنتيجة بيصر في دوبان مالي .

بعد انتهاء الأستاذ سليم سعادة من محاضرته عن حكاية أموال المودعين، افتتح القسم الثاني من الندوة وأعطي المجال للعديد من الحضور لتوجيه الأسئلة وللمداخلات، فتوالى على الكلام والسؤال والمداخلة  كثر نذكر منهم السادة:

– العميد الرماح

– الخبير المالي السيد أمين صالح

– الوزير السابق السيد فادي عبود

– العميد  مارون  بدر رئيس بلدية عين دارة

– السيد لبيب غانم

-السيد فاروق أبو جودة

– الأستاذ فارس سعد

– الأستاذ جميل مارون

– الأستاذ كمال فغالي

– العميد مارون حتي

– السيد خليل جداد

– العميد حبيب كيروز

وقد عبرت معظم المداخلات عن هواجس المواطنين، ووجعهم، وعن المستقبل القاتم الذي ينتظرنا، كما عبر البعض عن الغضب العارم عند الناس داعيا المسؤولين الى عدم تجربة غضب الناس لأنه حتما سيؤدي الى نتائج اجتماعية لا تحمد عقباها، وقد أجمع الجميع أن ما حصل هو نتاج غياب الدولة وغياب المحاسبة كما هو نتيجة النظام السياسي الطائفي الفاسد الذي يشرع المحسوبيات على حساب الحقوق، ويشرع الفساد على حساب القضاء والمحاسبة ويدمر هيكلية الدولة. والحل هو ببناء الدولة المدنية دولة المواطنة دولة القانون وليس دولة الكل يحكم أو لا أحد يحكم.

في نهاية الندوة دعت حضرة ألأمينة ناديا حجل باسم أصحاب القاعة المضيفة جميع الحضور إلى بوفيه مشكورة على تعاونها، حيث أعطيت للحضور الذي ناهز المئتان شخص، فرصة التعارف والتداول فيما بينهم.